La suprastanza cumünala da Scuol ha decis als 6 favrer 2017 da relaschar üna zona da planisaziun per duos ons. Quista zona da planisaziun es gnüda prolungada duos jadas per duos ons: dal 2019 fin als 16 favrer 2021 e dal 2021 fin als 16 favrer 2023. Als 23 schner 2023 ha decis la suprastanza cumünala da Scuol da prolungar la zona da planisaziun per ulteriurs duos ons, dimena fin als 16 favrer 2025. Cun decret dals 8 favrer 2023 ha approvà il departamaint d’economia publica e fats socials dal Grischun quista prolungaziun. La zona da planisaziun ha ils seguaints böts: Unir las planisaziuns localas dals cumüns fusiunats e tillas adattar a las prescripziuns dal plan directiv chantunal «abitadi» (relaschà dal chantun Grischun in basa a la revisiun da la ledscha federala davart la planisaziun dal territori [LPT1]). La zona da planisaziun vala per tuot il territori dal cumün fusiunà da Scuol. Aint illa zona da planisaziun nu's das-cha far nöglia chi pudess agravar la nouva planisaziun o s'oppuoner a quella. Quai voul dir particularmaing: permiss per progets da fabrica das-chan gnir concess be schi nu cuntrafan ne a las prescripziuns da la planisaziun in vigur ne a las prescripziuns da la planisaziun previssa (art. 21 al. 2 da la ledscha chantunala davart la planisaziun dal territori [LPTGR]). La zona da planisaziun vala fin cha las disposiziuns previssas sun in vigur, il plü tard però fin als 16 favrer 2025. Ün'ulteriura prolungaziun cul acconsentimaint dal Chantun resta resalvada. Cunter quista prolungaziun da la zona da planisaziun po gnir recuorrü infra 30 dis davo la publicaziun (dimena fin als 23 marz 2023) pro la Regenza dal chantun Grischun, quai cun recuors da planisaziun tenor l'art. 101 LPTGR. |
Scuol, 21 favrer 2023 |
La suprastanza cumünala |