17.09.2024
In vista a l’inviern dumandainsa als abitants da la vschinauncha da Segl d’observer las seguaintas prescripziuns:

Per eviter impedimaints e prievels pels ütiliseders da vias (servezzan d’inviern, transport d’immundizchas, trafic public, peduns e.o.p.) stu gnir taglieda la bos-cha e la fruschaglia lung las vias ufficielas e vias chi vegnan druvedas da veiculs publics i’l territori abito, e que uschè cha la ramma nu taundscha pü aint il spazi da la via (art. 9 da la ledscha da pulizia da Segl ed art. 21 da l’ordinaziun davart las vias dal chantun Grischun). Ad es d’eviter ch’ütiliseders da vias vegnan periclitos tres bös-chs chi cupichan u ramma chi rumpa giò suot la chargia da naiv. L’iglüminaziun da las vias e las tevlas da trafic nu suos-chan gnir zugliedas da plauntas. Lung las vias e marchapès ufficiels stöglian gnir alluntanos eir ogets na fixos chi markeschan cunfins da plazzas (recipiaints da lain, craps pü pitschens etc.).

Ils proprietaris da terrain cunfinant a la via vegnan dumandos da fer quistas lavuors fin la fin dals 31. october 2024. In cas ch’els nun observan quista prescripziun, s’arsalva la vschinauncha il dret da taglier la ramma a cuost dals proprietaris pertuchos.

La ramma taglieda po gnir deponeda fin il pü tard la fin dals prüm november 2024 tar la plazza da cumpost tar la sarinera Segl al Lej da Silvaplauna (vart dal süd da la sarinera). Scha la quantited surpassa 1.5 m3, stu gnir fatta ün’annunzcha tal mneder da l’uffizi da fabrica (079 521 98 92). Ad egen quint po eir gnir incumbenzo il silvicultur da revier (081 826 59 33).

Impü es da pisserer cha’ls sbuchins da las chanels sajan drizzos uschè ch’els nu condüan l’ova sün vias e sendas ufficielas düraunt ils mais d’inviern. Quistas lavuors haun da gnir fattas fin la fin dals 31. october 2024. Zieva quista data faro la gruppa da lavur quetaunt a cuost dal proprietari.

Eir las saivs da pascul haun da gnir alluntanedas. Tenor l’art. 95 da la ledscha da fabrica resp. l’art. 17 da l’uorden d’alp e pascul stöglian saivs da pascul gnir alluntanedas respectivmaing missas per terra zieva la perioda da pasculaziun.
L’administraziun cumünela da Segl
17.09.2024/ SILS i.E./SEGL
PDF herunterladen