10.04.2025
1.         Lieu e durada da l'exposiziun

Per prender invista èn las actas dal project exponidas dals 11 d'avrigl 2025 fin ils 11 da matg 2025 tar l'administraziun communala da la vischnanca da Segl, Via da Marias 93, 7514 Segl Maria, sco er tar l'Uffizi da construcziun bassa dal Grischun, Loëstrasse 14, 7000 Cuira (art. 11 da la Lescha chantunala davart la correcziun dals curs d'aua; LCCA, DG 807.700). Durant il temp d'exposiziun pon ils documents er vegnir consultads e chargiads giu sut www.tiefbauamt.gr.ch > Rumantsch > Actualitads. 

2.         Dumondas per permissiuns spezialas

Las suandantas dumondas èn parts dal project d'exposiziun:


  • dumonda da permissiun per inducir u per laschar sfundrar aua persa smerdada tractada tenor l'art. 7 al. 1 da la Lescha federala davart la protecziun da las auas.
  • dumonda da permissiun per construir edifizis e stabiliments en secturs da l'aua sutterrana spezialmain periclitads tenor l'art. 19 al. 2 da la Lescha federala davart la protecziun da las auas.
  • dumonda da permissiun per construir stabiliments ch'èn dependents dal lieu e che stattan en l'interess public en il spazi d'auas tenor l'art. 41c al. 1 da l'Ordinaziun davart la protecziun da las auas.
  • dumonda da permissiun tenor la legislaziun da pestga per far intervenziuns tecnicas en las auas tenor l'art. 8 al. 1 da la Lescha federala davart la pestga.

3.         Restricziun dal dretg da disponer

A partir dal di che l'exposiziun è vegnida publitgada uffizialmain dovran ils projects da construcziun entaifer il territori ch'è cumpiglià dal project ina permissiun dal Departament d'infrastructura, energia e mobilitad dal Grischun. Questa permissiun vegn concedida, sch'il project da construcziun n'ha naginas consequenzas engrevgiantas per acquistar il terren u per realisar il project.

4.         Protestas

4.1       Legitimaziun

Tgi ch'è pertutgà dal project d'exposiziun e po far valair in interess degn da protecziun per abolir u per midar quel, ha il dretg da far protesta. Il dretg da far protesta han plinavant las vischnancas pertutgadas e tgi ch'è autorisà tras il dretg federal da far quai.

4.02      Objecziuns

Vegnir fatgas valair pon:

a)     objecziuns cunter il project d'exposiziun e cunter las dumondas per ulteriuras permissiuns ch'èn colliadas cun quel sco er cunter in'expropriaziun previsa e cunter sia dimensiun;

b)     dumondas d'indemnisaziun, en spezial pretensiuns per ils dretgs che vegnan fatgs valair ed autras pretensiuns che resultan dal dretg chantunal d'expropriaziun. Questas dumondas vegnan rectifitgadas suenter l'approvaziun dal project en la procedura per l'acquist da terren.

4.3       Termin ed adressat

Protestas ston vegnir inoltradas entaifer il temp d'exposiziun cun ina curta motivaziun al Departament d'infrastructura, energia e mobilitad dal Grischun, Ringstrasse 10, 7001 Cuira.

Sche pretensiuns d'indemnisaziun vegnan fatgas valair posteriuramain, ston vegnir observadas las consequenzas da la negligientscha tenor l'art. 17 da l'Ordinaziun chantunala d'expropriaziun (OExp; DG 803.110).

Departament d'infrastructura, energia e mobilitad dal Grischun
PDF herunterladen