Actualmaing vala i’l Cumün da Zernez üna zona da planisaziun chi sta in connex culla revisiun totala da la planisaziun locala, gnüda decretada da la suprastanza cumünala als 31 lügl 2018. A basa da l’artichel 21 da la ledscha chantunala per la planisaziun dal territori (KRG) ha la suprastanza cumünala decretà in üna decisiun dals 15 lügl 2020 da vulair prolungar la zona da planisaziun per ulteriurs duos ons. |
|
Mera da la zona da planisaziun | La zona da planisaziun serva impustüt a seguainta mera: - manar insembel las planisaziuns localas dals anteriurs cumüns Zernez/Brail, Susch e Lavin in üna planisaziun locala omogena; - adattar la planisaziun locala a las pretaisas da la ledscha federala da planisaziun dal territori, da la ledscha chantunala da planisaziun dal territori revaisa ed al plan directiv chantunal, part abitadi. In special sun d’adattar las zonas da fabrica al bsögn per 15 ons, mobilisar reservas da zonas da fabrica e da controllar il fabrichar cumpact; - adattamaints ad ulteriuras ledschas superiuras. |
Territori pertoc da la zona da planisaziun | La zona da planisaziun cumpiglia tuot il territori cumünal. Il departamaint d’economia publica e da fats socials dal Chantun Grischun ha approvà la prolungaziun da la zona da planisaziun cun ün decret dals 28 lügl 2020. Illa zona da planisaziun nu das-cha gnir fat inguotta chi difficultescha obain chi’d es cuntrari a la nouva planisaziun. In special das-chan gnir permiss intents da fabrica be sch’els nu cuntradischan a planisaziuns e prescripziuns legalmaing valablas obain pussiblas futuras. Davo l’approvaziun dals mezs da planisaziun revais tras la Regenza dal chantun Grischun vegn darcheu abolida la zona da planisaziun. Cunter quista decisiun po gnir fat recuors infra 30 dis pro la Regenza dal chantun Grischun daspö la publicaziun i’l fögl ufficial chantunal. |
Zernez, 28 lügl 2020 | |
Cumün da Zernez Suprastanza cumünala |