Trattativas da la suprastanza cumünala Zernez
Mountainbike Masterplan – credit pel concept da realisaziun
La regiun da l’Engiadina Bassa, Val Müstair e Samignun han laschà elavurar ün «Mountainbike Masterplan», chi prevezza d’investir ils prossems ons in tragets da mountainbike. Pel Cumün da Zernez esa previs investiziuns i’ls contuorns dal Pass dal Flüela. La suprastanza ha approvà in ün prüm pass il credit per l’elavuraziun d‘ün concept da realisaziun.
Trafic public – avegnir da la lingia da bus tanter La Punt e Zernez
La lingia da bus «lingia 7» da La Punt fin Zernez e viceversa es deficitaria e dà andit a discussiuns. La suprastanza ha approvà il credit per realisar ün stüdi da variantas per l’avegnir da la lingia da bus tanter La Punt e Zernez. L’incumbenza pel stüdi es gnü surdat a la firma Rapp Trans AG e vegn finanziada eir da la regiun Maloja e da l’uffizi d’energia e da trafic dal Chantun.
Zernez Energia 2020 – proget d'accumpognamaint da la scoul'ota a Lucerna
In october 2018 ha gnü lö ün lavuratori ingiochi d’eiran preschaints commembers da la suprastanza cumünala e da la cumischiun Zernez Energia 2020 sco eir trais collavuraturs da la scoul’ota da Lucerna. Al workshop sun gnüdas eruidas pussibiltats per pudair activar e far gnir plü cuntschaint il proget sainza stuvair dovrar massa bleras resursas. La scoul’ota da Lucerna es gnüda incumbenzada d’elavurar üna proposta sco cha’l proget Zernez Energia 2020 as dess sviluppar in avegnir. La suprastanza ha approvà il credit ed ha dat glüm verda per cumanzar il proget.
Zernez Energia 2020 – tablas d'infuormaziun
In connex culla promoziun dal proget Zernez Energia 2020 ed il premi d’energia vaiva la cumischiun Zernez Energia 2020 decis da vulair signalisar ils abitaculs, chi sun gnüts sanats energeticamaing, cun tablas d’infuormaziun. Quista masüra dess esser ün augmaint implü per l’acceptanza dal proget Zernez Energia 2020. La suprastanza ha acceptà la dumonda da credit per realisar las tablas d’infuormaziun.
Progets – diversas dumondas da princip
La suprastanza cumünala ha trattà ed approvà il cumanzamaint dals seguaints progets: sanaziun ed ingrondimaint da la chasa da scoula Zernez, sistem da controlla da l’aua da baiver, progettaziun sanaziun sarinera Zernez, sanaziun da la via da god Arduond a Zernez, sanaziun dal provedimaint d’aua da l’Alp Barlas-ch Suot a Brail, sanaziun dals mürs da sustegn da la punt dal Spöl a Zernez. Quists progets sun gnüts approvats in radunanzas cumünalas i’ls ons scuors. Cun quistas approvaziuns s’haja dat glü m verda a la realisaziun dals progets chi vegn manada da la direcziun operativa.
Zona da quietezza temporara per la sulvaschina-Laviner dal Müt fin Val da Barcli
Il guardgiasulvaschina da Zernez e l’uffizi da chatscha e pes-cha dal Grischun han dumandà al cumün da pudair s-chaffir üna zona da quietezza temporara per la sulvaschina i’l cuntegn dal Laviner dal Müt fin Val da Barcli. La problematica es cha persunas s’avicinan in quist cuntegn a la sulvaschina per fotografar o lura da prümavaira per ir in tschercha da cornas. Id es gnü decis da laschar ir in vigur quista zona da quietezza temporara a partir dals 11 favrer fin als 15 avrigl 2019.
Radunanza cumünala dals 28 marz 2019 – tractandas definitivas
La suprastanza cumünala ha approvà la glista da tractandas per la radunanza cumünala dals 28 marz 2019. A quista radunanza vain preschantada la revisiun parziala da la planisaziun locala da la protecziun da las auas. Plünavant eir la planisaziun locala da seguondas abitaziun cun inventar d’objects.
Statistica sezzüdas, radunanzas e votaziun 2018
Il chanzlist ha orientà a la suprastanza sur da la quantità da sezzüdas e tractandas da l’on 2018. La direcziun operativa ha trattà 527 tractandas in 25 sezzüdas, percunter ha la suprastanza cumünala trattà 242 affars in 17 sezzüdas. In trais radunanzas cumünalas han votantas e votants decis davart 18 tractandas. Dürant l’on 2018 haja dat quatter votaziuns a l’urna.