Trattativas da la suprastanza cumünala Zernez
Sanaziun ed ingrondimaint chasa da scoula Zernez
La radunanza cumünala dals 25 avrigl 2018 ha deliberà il credit da 9.6 miu. francs per la sanaziun e l’ingrondimaint da la chasa da scoula a Zernez. La glista da submittents e la calculaziun da cuosts es gnüda approvada.
Pulizia cumünala – dumonda da princip
Per accumplir plü bain e professiunal las lezchas da la pulizia cumünala as voul proseguir in avegnir cun üna collavuraziun culla pulizia chantunala, in collavuraziun culs cumüns da S-chanf e Val Müstair. La suprastanza ha trattà ed approvà la dumonda da princip. La dumonda da credit vain preschantada a la radunanza cumünala dals 23 avuost 2019.
Cuosts da müdamaint da destinaziun turistica
Cuntschaintamaing es gnü decis illa radunanza cumünala dals 25 avrigl 2018 da vulair proseguir süls 1. schner 2019 culla destinaziun turistica Engadin Scuol, Samnaun Val Müstair AG (TESSVM). Il müdamaint da la destinaziun turistica da l’ESTM sülla TESSVM ha chaschunà cuosts, sco chi d’eira eir previs e comunichà, impustüt causa chi’d es gnü gesti parallel e quai dürant tuot il mais december 2018. Ils cuosts per quist temp transitoric sun gnüts approvats.
Vendita da terrain ed immobiglias a persunas da l’ester – decisiun d’armonisaziun
L’armonisaziun da la tematica da pudair vender eir a persunas da l’ester terrain ed immobiglias nun es amo successa davo la fusiun. La dumonda d’armonisaziun, cun üna quota da 100% sur tuot il Cumün da Zernez, es gnüda approvada. La dumonda vain trattada a la radunanza cumünala dals 23 avuost 2019.
Munt da Brail – surdatta per ün stüdi da concept da la sgürezza d’inviern
L’incumbenza per realisar ün stüdi da concept per la sgürezza d’inviern sül Munt da Brail es gnüda surdatta a la firma Geoformer IGP AG a Brig-Glis.
Radunanza cumünala dals 24 gün 2019
La glista da tractandas per la radunanza cumünala dals 24 gün es gnüda approvada. A quista radunanza vain preschantà principalmaing il rendaquint 2018.