Trattativas da la suprastanza cumünala Zernez
Plazza Plaz – p58 – cunvegna culla banca Raiffeisen
Cuntschaintamaing ha la Banca Raiffeisen Engiadina Val Müstair fabrichà intuorn la chasa no. 86 in Plaz a Zernez in seis nouv center d’elavuraziun regiunal. Per reglar ils detagls da la fabrica e da la gestiun da la plazza davant il stabilimaint es gnü abinà üna cunvegna tanter il Cumün da Zernez e la banca Raiffeisen. La cunvegna es gnüda approvada.
Refacziun inchaschamaint aua da baiver Lavin-Funtanivas – finischun dal proget
La refacziun dals inchaschamaints d’aua da baiver a Lavin – Funtanivas es gnüda realisada dal 2016 ed ha pudü gnir finida giò cun success dal 2018. La finischun dal proget es gnü tut a cogniziun in sen positiv.
Zernez Energia 2020 – dumonda da sustegn
Ün’ulteriura dumonda da sustegn per sanaziuns energeticas d’abitaculs illa fracziun da Zernez our dal fondo Zernez Energia 2020 es gnüda approvada.
Taxas da la controlla d’abitants
La suprastanza cumünala ha approvà las nouvas taxas da la controlla d’abitants chi va in vigur a partir dal mai 2019.
Controlla da gestiun inviern 2018/19
Al cumanzamaint da schner 2019 ha fat la cumischiun sindicatoria la controlla da gestiun. La direcziun operativa ha tut in consegna la notizcha d’acta e tilla ha trattada. La resposta es gnüda preschantada ed approvada da la suprastanza.
Rendaquint 2018
La suprastanza cumünala ha repassà detagliadamaing il rendaquint 2018 insembel culla cumischiun sindicatoria, cul revisur extern da la Lischana fiduziari SA a Scuol e culla direcziun operativa. Il rendaquint es gnü approvà e deliberà a man da la radunanza cumünala dals 24 gün 2019. A la radunanza cumünala vain proponü da s-chaffir üna prefinanziaziun a favur da la sanaziun da la chasa da scoula.