Trattativas da la suprastanza cumünala Zernez
Iniziativa «Per üna suprastanza ed ün cussagl da scoula legitimà democraticamaing»
Als 6 mai 2019 es entrada ün’iniziativa dal pövel suottascritta da 108 votantas e votants dal Cumün da Zernez. Principalmaing pretenda l’iniziativa da strichar la rapreschantanza obligatorica da las fracziuns i’ls gremis da la suprastanza cumünala e dal cussagl da scoula our da la constituziun cumünala ed our da la ledscha da votaziun ed elecziuns cumünala. L’iniziativa es gnüda controllada e las suottascripziuns sun gnüdas verifichadas. La suprastanza cumünala ha tut cogniziun da l’iniziativa ed invia ils pass necessaris d’elavuraziun.
Sanaziun via maistra Zernez – partecipaziun cuosts d’attach d’infrastructura privata tras privats – decisiun da princip
In connex culla fabrica da la sanaziun da la via maistra tras Zernez es gnü incumbenzà il büro Caprez SA a Zernez da calcular ils cuosts per eventuals attachs privats vi da l’infrastructura publica. La dumonda da princip a reguard l’andamaint es gnüda approvada.
Contrat Burning Mountain
Dals 20 fin als 23 gün 2019 ha lö per la novavla vouta a Zernez il festival Burning Mountain. Il contrat chi regla tuot ils detagls e las pretaisas davart dal cumün invers l’organisatur, es gnü approvà.
Iglüminaziun publica – concept pel futur – decisiun da princip
Per garantir in futur ün sistem d’iglüminaziun per tuot las fracziuns dal Cumün da Zernez in LED, collià in üna rait culla pussibiltà d’integrar illa plattafuorma cumünaivla da manisaziun «aivla», ha la suprastanza approvà il concept e deliberà la prüm’etappa da glüms, uschè cha’l proget po gnir inizià e manà inavant cuntinuadamaing.
Pass dal Flüela – Plan Grond-God Champatsch – correcziun via chantunala – cunvegna da baratada terrain
La suprastanza cumünala ha approvà la cunvegna da barat da terrain cun l’uffizi chantunal da construcziun bassa per la correcziun da la via chantunala dal Pass dal Flüela tanter Plan Grond e God Champatsch.