Trattativas da la suprastanza cumünala Zernez
Dumonda per ün sustegn finanzial pel arrandschamaint «150 ons incendi dal cumün Lavin»
Als 1. october 2019 esa nan 150 ons daspö la catastrofa da l’incendi da Lavin. Ils organisaturs prevezzan da realisar ün arrandschamaint cun differentas occurrenzas culturalas i’l temp da la fin settember fin la fin november 2019. Ils organisaturs han dumandà al Cumün da Zernez per ün sustegn finanzial. La contribuziun es gnüda concessa.
Revisiuns parzialas da diversas ledschas cumünalas pels 1. schner 2020 – prüma lectüra
Illa prüma perioda d’uffizi davo la fusiun da cumüns s’ha pudü ramassar experienzas in connex cun la legislaziun cumünala per part fich nouva. Davoman s’ha ramassà decisiuns trattas in connex cun l’applicaziun da las ledschas e reglamaints. Eir in seguit a l’entrada da l’iniziativa «Per üna suprastanza ed ün cussagl da scoula legitimà democraticamaing», reguard ils sezs da las fracziuns, s’ha uossa preparà la prüma revisiun da diversas ledschas e reglamaints. Ils gremis respunsabels han repassà il prüm sböz. La seguonda lectüra vegn fatta la fin d’october. La suprastanza cumünala prevezza da tractandar la revisiun da las ledschas illa radunanza cumünala dals 26 november 2019 e la votaziun a l’urna es previssa in favrer 2020.
Revisiun parziala da la ledscha d'impostas pels 1. schner 2021
Als 12 favrer 2019 ha il Grond Cussagl approvà la revisiun parziala da la ledscha d’impostas chantunala. Perquai ha la suprastanza cumünala decis sur da pitschens müdamaints vi da la ledscha e tilla approvada per rinviar a man da la radunanza cumünala. Davo la radunanza vain la ledscha d’impostas suottamissa a la votaziun a l’urna.
Plazza davant la banca Raiffeisen a Zernez
Cuntschaintamaing ha la Banca Raiffeisen Engiadina Val Müstair fabrichà in Plaz a Zernez il nouv center d’elavuraziun regiunal. La suprastanza ha confermà la dumonda da fabrica da metter sülla plazza davant la banca üna sculptura d’ün uors invezza d’ün bügl.
Sistem d'orientaziun per Susch
Cull’avertüra dal Muzeum ma eir culla clinica Holistica a Susch, chi attiran divers giasts e cliaints da tuot il muond as voul proseguir cun ün nouv sistem d’orientaziun. Per quist motiv ma eir in vista al squitsch da la tenuta da spargnar ha la suprastanza cumünala deliberà il credit per l’elavuraziun d’ün concept per ün sistem d’orientaziun illa fracziun da Susch. Il böt da realisar eir ün concept per las otras fracziuns resta intant pendent.
Forz’electrica – definiziun «contribuziun al man public» per l’on 2020
Minch’on ston ils cumüns definir l’import chi vain indemnisà pels drets da passagi/transport d’energia, la «contribuziun al man public». Illas fracziuns da Brail, Zernez, Susch e Lavin pajan ils abitants fin uossa 0.6 raps/ukw. La suprastanza ha decis da laschar l’import eir pel 2020 sco fin uossa. L’import da 1.5 raps/ukw pel proget Zernez Energia 2020 vain inchaschà eir in avegnir be illa fracziun da Zernez.
Radunanza cumünala dals 23 avuost 2019
La glista da tractandas per la radunanza cumünala dals 23 avuost 2019 es gnüda approvada. A quista radunanza vain preschantada principalmaing la revisiun parziala da la planisaziun locala da seguondas abitaziuns cun inventar d’objects. Plünavant eir la planisaziun locala da la protecziun da las auas.