Trattativas da la suprastanza cumünala Zernez
Prüma lectüra preventiv 2020
Ils gremis respunsabels han repassà il prüm sböz dal preventiv dal quint da success e dal quint d’investiziuns per l’on 2020. La seguonda lectüra dal preventiv 2020 ha lö cumanzamaint october.
Proget Via Maistra Zernez – posiziun da la cumischiun da planisaziun dal Cumün da Zernez
La cumischiun da planisaziun dal Cumün da Zernez ha tut posiziun al proget da l’uffizi da construcziun bassa davart la sanaziun da la Via Maistra a Zernez. La posiziun es gnüda trattada da la suprastanza cumünala.
Zernez Energia 2020 – dumondas da sustegn
La suprastanza cumünala ha trattà ed approvà duos dumondas da sustegn our dal fondo Zernez Energia 2020 per sanaziuns energeticas d’abitaculs illa fracziun da Zernez.
Cumischiun per il management integral dal territori En/Rom
La conferenza da presidents da la regiun Engiadina Bassa/Val Müstair ha da s-chaffir üna cumischiun per il management integral dal territori (Integrales Einzugsgebietsmanagement IEM). Mincha cumün intretschà ha da delegar üna persuna incumbenzada. Pel Cumün da Zernez es gnü elet Riet Denoth sco commember da la suprastanza cumünala cul dicasteri ambiaint e cultura.
Desditta plazza da lavur – manader da finanzas ed impostas e commember da la direcziun operative
Causa la desditta da la plazza da la lavur da Flurin Lehner, manader da finanzas ed impostas e commember da la direcziun operativa sülla fin da schner 2020, es gnüda publichada la plazza süls chanals da cumün, illas gazettas Engadiner Post/Posta Ladina e Südostschweiz.