Trattativas da la suprastanza cumünala Zernez
Büro electoral dals 20 october 2019
La suprastanza ha elet il büro electoral per las elecziuns naziunalas dals 20 october 2019. Al büro electoral fan part: Emil Müller sco president, Beat Schärer, Simon Rohner, Seraina Bickel, Stefan Bühler, Martina Peretti, Riet Denoth, Riet Felix e Corsin Scandella sco actuar.
Survista dals progets e da las pendenzas
La suprastanza cumünala ha discus sur da tuot ils progets e las pendenzas da mincha suprastanta e mincha suprastant. Uschè es la suprastanza orientada sur dals progets chi sun actualmaing in trais-cha.
Controlla da gestiun stà 2019 tras la cumischiun sindicatoria
La cumischiun sindicatoria ha manà tras la fin da gün 2019 la controlla da gestiun. La direcziun operativa ha tut incunter la notizcha d’acta e tilla ha elavurada. La resposta es gnüda preschantada ed approvada da la suprastanza cumünala.
Grischa Care Zernez AG – delegaziun cumünala i’l cussagl administrativ
La suprastanza cumünala ha decis da delegar a Seraina Bickel, sco suprastanta dal Cumün da Zernez, i’l cussagl administrativ da la Grischa Care Zernez AG.
Repars da lavinas Munt Baselgia Zernez – surdatta lavurs da refacziun
Tenor las controllas chi sun gnüdas fattas d’instà 2019 dals repars da lavinas sü Munt Baselgia a Zernez s’haja constatà dons plü gronds vi da la fundamainta dals repars. Per garantir la sgürezza dal privel da lavinas pel prossem inviern esa necessari da refar quists dons amo quist on. La suprastanza ha deliberà il credit e surdat l’incumbenza a la firma Foffa Conrad SA da Zernez.
EW Zernez – proget sanaziun via maistra – part proget colliaziun staziun da transfuormaziun Baselgia a la cabina da scumpart futura Baselgia – decisiun
In connex culla planisaziun da la sanaziun da la via maistra tras Zernez s’ha cristallisà oura, chi fa dabsögn d’üna colliaziun tanter la staziun da transfuormaziun Baselgia ed üna nouva cabina da scumpart Baselgia. La suprastanza ha deliberà il credit e dat glüm verda per realisar quist proget, per nüzziar la sinergia d’ün fabricat privat in Curtins.
Contrat tanter il Cumün da Zernez e l’EE-Energia Engiadina Scuol
La suprastanza cumünala ha approvà ün contrat tanter il Cumün da Zernez e l’EE-Energia Engiadina Scuol. Quist contrat regla cha l’EE-Energia Engiadina po marchantar cun cliaints gronds da tuot il cumün da Brail fin Lavin reguard il consüm da forz'electrica cun energia da concessiun, da rimplazzamaint e d'aigna producziun.
Persunal
Principi favrer cumainza Jean Pierrick Bergamin da Suhr, sco nouv manader da finanzas e commember da la direcziun operativa, sia plazza da lavur pro’l Cumün da Zernez. Jean Pierrick Bergamin rimplazza l’ingaschamaint dal collavuratur Flurin Lehner chi banduna la secziun da finanzas sülla fin da schner 2020.