Trattativas da la suprastanza cumünala Zernez
Persunal
La suprastanza cumünala es gnüda orientada da la direcziun operativa davart l’elecziun d’üna nouva secretaria da scoula. Ingaschada es gnüda Flurina Eichholzer da Zernez. Ella surpiglia ün pensum parzial sper sia lavur pro’l center da documaints d’identità regiunal a Zernez. Ella aintra in plazza als 1. schner 2020 e rimplazza l’ingaschamaint da la collavuratura Monica Schöpf chi banduna sia plazza da lavur sülla fin da december 2019.
Deliberaziun dal preventiv 2020 a man da la radunanza cumünala dals 26 november 2019
La suprastanza cumünala ha surlavurà il preventiv dal quint da success e dal quint d’investiziun per l’on da gestiun 2020 ed approvà tals a man da la radunanza cumünala chi ha lö la fin da november.
Pè d’impostas cumünalas per l’on 2020
A basa da la situaziun actuala da finanzas dal Cumün da Zernez propuona la suprastanza a man da la radunanza cumünala dals 26 november 2019 da laschar il pè d’impostas pel 2020 sün 84% da l’imposta chantunala.
Sistem d’orientaziun per Susch
Cuntschaintamaing es gnü realisà quista stà ün concept per ün sistem d’orientaziun per la fracziun da Susch. La suprastanza ha deliberà la dumonda da credit per la realisaziun da quist proget i’l 2020.
Implant da tir 300m a Zernez
La suprastanza cumünala ha approvà la varianta e sustegna cun ün credit per trais schaibgias pel proseguimaint da l’avegnir da l’implant da tir 300m illa fracziun da Zernez.
S-chodamaint central Cul – stüdi da concept
Per avair in avegnir üna buna strategia pels attachs privats, chi tachan vi da la rait dal s-chodamaint central in Cul, es gnü elavurà ün stüdi da concept dal büro d’indschegners Torsten Hartmann da Bonaduz. La suprastanza ha approvà il concept cun far tscherts adattamaints/müdamaints.
Büro electoral dals 24 november 2019
La suprastanza ha elet il büro electoral per las votaziuns cumünalas dals 24 november 2019. Al büro electoral fan part: Stefan Bühler sco president, Beat Schärer, Martina Peretti, Seraina Bickel e Corsin Scandella sco actuar.
Radunanza cumünala dals 26 november 2019
La glista da tractandas per la radunanza cumünala dals 26 november 2019 es gnüda approvada. A quista radunanza vain preschantà principalmaing il preventiv dal quint da success e dal quint d’investiziun per l’on 2020.
Termins 2020
L’agenda da termins 2020 es gnüda approvada. Dürant il 2020 as fa quint cun quatter radunanzas cumünalas, 17 sezzüdas da la suprastanza cumünala e cun 26 sezzüdas da la direcziun operativa. Implü sun gnüts fixats ils termins dals tavulins.
CUMCO prestaziun da construcziun – cunvegna
Cuntschaintamaing han cuntrafat diversas dittas in Engiadina ed eir in tuot il Chantun Grischun a las ledschas da submissiun. Il departamaint da construcziun, trafic e silvicultura dal Chantun Grischun ha pudü conclüder cun diversas dittas cunvegnas da pajamaint reguard ils rinfatschamaints. Id es previs da suottascriver la cunvegna tanter il Chantun Grischun ed il Cumün da Zernez davo ün’occurrenza da la CUMCO chi ha lö i’l decuors dal november 2019. Cun suottascriver quella cunvegna as muossa il Cumün da Zernez perinclet cul proceder dal Chantun Grischun.