Trattativas da la suprastanza cumünala Zernez
Survaglianza da video – deponia Sur Röven a Zernez – decretaziun generala
Il Chantun Grischun ha deliberà avant bundant ün on ün’ordinaziun chi regla la survaglianza da video i’l territori public. Quist’ordinaziun vala a partir dals 1. schner 2019 e po gnir dovrada sco basa legala per cumüns chi nun han svess üna ledscha cumünala correspundenta. Per reglar la survaglianza da video illa deponia cumünala in Sur Röven a Zernez as cuntinua cun ün decret general. La survaglianza cumpiglia il perimeter da la deponia e dess impustüt impedir deposit da material e s-chart illegal in quist lö, quai chi vain pretais eir da l’uffizi per la natüra e l’ambiaint. La suprastanza ha trattà ed approvà il decret general.
Revisiun parziala da la ledscha da god chantunala – posiziun
Ils cumüns dal Grischun sun gnüts invidats da consultar la revisiun parziala da la ledscha da god. La posiziun preparada dals respunsabels dal cumün es gnüda approvada.
Contrat cun l’instituziun Holzvermarktung Graubünden AG
Cuntschaintamaing es il Cumün da Zernez acziunari da la Holzvermarktung Graubünden AG (ex. Reziaholz GmbH). Ad ün di d’infuormaziun dals acziunaris da la Holzvermarktung Graubünden AG es gnü adattà e cumplettà il contrat dals acziunaris in connex culla nouva società. La suprastanza ha approvà il contrat d’acziunaris ed il contrat dal marchà da laina, chi ha üna dürada da tschinch ons.
Pumpiers Zernez – cumpra da duos veiculs (salvamaint sün via e gruppa da gas) – rendaquint final dal credit
Il proget da la cumpra da duos veiculs pels pumpiers Zernez es fini ed es gnü preschantà a la suprastanza cumünala. Il rendaquint vain tut a cogniziun in sen positiv. Ad üna prosma radunanza cumünala vain il proget preschantà a las votantas ed als votants.
Demischiun sco commembra da la suprastanza cumünala dal Cumün da Zernez
La suprastanta Martina Peretti da Susch ha demischiunà sia carica sco commembra da la suprastanza cumünala dal Cumün da Zernez. Las votantas ed ils votants dal Cumün da Zernez as dessan far impissamaints reguard d’ün ingaschamaint politic a favur dal Cumün da Zernez.