Trattativas da la suprastanza cumünala Zernez
Planisaziun locala – «kommunal räumliches Leitbild» – decisiun da princip a reguard proceder
Cuntschaintamaing ha la cumischiun da planisaziun dal Cumün da Zernez elavurà il sböz dal «kommunal räumliches Leitbild». Quist documaint fuorma la basa pel proseguimaint da l’armonisaziun da la planisaziun locala. In ün prossem pass dess quist gnir preschantà a la populaziun in fuorma d’ün lavuratori. La moderaziun da quista preschantaziun vain sustgnüda da la scoul’ota da Lucerna. La suprastanza ha approvà il credit ed il proceder dal proget.
EW Zernez – staziun da transfuormaziun TS Baselgia – rimplazzamaint scumpart mezza tensiun – decisiun da princip
L’indriz da scumpart da mezza tensiun da la staziun da transfuormaziun in Baselgia a Zernez sto gnir rimplazzada causa ün don da corrosiun. La suprastanza ha approvà l’inizi dal proget.
EW Zernez – indrizs da cumpensaziun per la rait electrica – credit supplementar
Id es gnü concess a la radunanza cumünala dals 30 november 2018 il credit per las lavurs d’investiziuns a reguard il proget «Netzentwicklung Engadin». La fin da l’on 2019 es l’EW Zernez gnü infuormà da las OEE SA davart il surpassamaint da cuosts per quist proget. Per reglar la finanziaziun e tuot ils detagls da la collavuraziun tanter las OEE SA e las ouvras colliadas es gnü preparà ün contrat correspundent. La suprastanza ha trattà ed approvà il contrat, resalv l’approvaziun dal credit supplementar tras la radunanza cumünala dals 26 marz 2020.
Refacziun da la via da god Munt Baselgia a Zernez – surdatta lavurs da progettaziun
Per pudair proseguir cun la progettaziun da la via da god Munt Baselgia es gnüda surdatta l’incumbenza a la firma Caprez Ingenieure AG a Silvaplana.
Büro electoral dals 9 favrer 2020
La suprastanza cumünala ha elet il büro electoral per las votaziuns dals 9 favrer 2020. Al büro electoral fan part: Emil Müller sco president, Riet Denoth, Simon Rohner, Seraina Bickel e Corsin Scandella sco actuar.