Trattativas da la suprastanza cumünala Zernez
Elecziun dal vicepresidenta partir dals 1. favrer 2020
Causa la demischiun da Martina Peretti sco commembra da la suprastanza cumünala ed in sia carica eir sco vicepresidenta süllafin da gün 2020 ha la suprastanza cumünala elet in sia sezzüda al suprastant Riet Denoth sco vicepresident dal Cumün da Zernez.
SIE Nudigls Susch – refacziun via da god – dumonda da princip
La prüma part da la via da god Nudigls a Susch es in ün nosch stadi ed id es necessari da far üna refacziun punctuala, impustüt dals mürs da sustegn. Cun quista refacziun es garantida eir per l’avegnir üna cultivaziun dal god Val Ota e dal god Raglia. Il credit es gnü approvà illa radunanza cumünala dals 26 november 2019. La suprastanza ha approvà l’inizi dal proget.
Sistem da process provedimaint d’aua TWN / QS – dumonda da princip e surdatta
La prüma etappa da las lavurs d’installaziun dal sistem da process es gnüda manada tras dal 2019 e quai cumpiglia il provedimaint d’aua da la fracziun da Brail ed üna part da la fracziun da Zernez. L’installaziun es necessaria per survagliar ed avair suot controlla in avegnir tuot ils provedimaints d’aua dal Cumün da Zernez. L’elavuraziun dal QS (Qualitätssicherung) e dal TWN (Trinkwasserversorgung in Notlagen) es planisada pel 2021/2022. La suprastanza ha approvà l’inizi da la seguonda etappa per installar a fin il sistem da process vi dals provedimaints d’aua illas fracziuns da Zernez, Susch e Lavin. L’incumbenza da l’installaziun es gnüda surdatta a la firma Züllig AG a Rheineck.
Büro electoral dals 17 mai e 7 gün 2020
La suprastanza ha elet i’l büro electoral per las votaziuns federalas, chantunalas e cumünalas dals 17 mai 2020 sco seguaint: Emil Müller sco president, Beat Schärer, Martina Peretti, Simon Rohner, Stefan Bühler, Seraina Bickel, Riet Denoth, Adriana Müller, Sina Schorta e Corsin Scandella sco actuar. Al büro electoral da las elecziuns cumünalas dals 7 gün 2020 fan part: Emil Müller sco president, Riet Denoth, Seraina Bickel, Simon Rohner, Corsin Scandella obain Fabian Schorta sco actuar.
Statistica sezzüdas, radunanzas e votaziuns 2019
La suprastanza cumünala es gnüda orientada sur da la quantità da sezzüdas e tractandas da l’on 2019. La direcziun operativa ha trattà 468 tractandas in 26 sezzüdas, percunter ha la suprastanza cumünala trattà 230 affars in 18 sezzüdas. In trais radunanzas cumünalas han votantas e votants decis sur da 17 tractandas. Dürant l’on 2019 haja dat üna votaziun a l’urna.