Trattativas da la suprastanza cumünala Zernez
OE Sarsura – decisiun da proseguimaint
La suprastanza cumünala ha decis in favrer 2018 da vulair cumbatter pel proget da realisaziun da l’ouvra electrica illa Val Sarsura cun realisar al medem mumaint eir la sablunera dal provedimaint d’aua. I’l fratemp sun entradas tuot las confermas e permiss bsögnaivels uschè cha l’ouvra po gnir realisada. La suprastanza cumünala ha decis in ün prüm pass da laschar scriver oura l’ouvra in fuorma d’impressari general (Generalunternehmer) obain d’impressari total (Totalunternehmer). Cun quist pass as voul ragiundscher daplü sgürezza da cuosts e natüralmaing eir redüer il ris-ch dal patrun da fabrica. In seguit a las entradas da las offertas decida la suprastanza inavant davart dal proseguimaint.
Planisaziun d’areal in Cul Zernez – decisiun e rinviaziun
Daspö il 2015 es la cumischiun da planisaziun d’areal Cul insembel culs planisaders cumünals landervia a s-chaffir ün prodot chi resguarda ils bsögns cumünals, regiunals, chantunals e da la mansteranza actuala e futura, sainza laschar our d’ögl ils bsögns dal turissem e da l’agricultura. La suprastanza cumünala ha trattà ed approvà il sböz dal plan d’areal in Cul a Zernez. Tal vain rinvià per la preexaminaziun al chantun Grischun.
Ledschas cumünalas – revisiuns parzialas da diversas ledschas
Ils gremis respunsabels sun repassats l’ultim sböz da diversas ledschas cumünalas. La suprastanza prevezza da tractandar la revisiun da las ledschas illas prosmas radunanzas cumünalas chi han lö i’l decuors da l’on 2020. Davo la decisiun da la radunanza vegnan las ledschas suottamissas a la votaziun a l’urna.
Contrat supplementar TESSVM
La destinaziun turistica Engadin Scuol Samnaun Val Müstair AG (TESSVM) ha suottamiss il contrat supplementar al contrat da prestaziun culla TESSVM. Tal regla ils drets da surtour pel cas da la sortida dal contrat. La suprastanza ha approvà il contrat supplementar da la TESSVM.