Trattativas da la suprastanza cumünala Zernez
Sezzüda d’infuormaziun e d’orientaziun cun las Ouvras Electricas d’Engiadina SA
La suprastanza cumünala es gnüda insembel culs commembers da la direcziun da las OEE SA ad üna sezzüda d’infuormaziun. I s’ha orientà vicendaivelmaing e barattà infuormaziuns sur da differents progets passats, actuals e futurs. Il Cumün da Zernez s’ha specialmaing ingrazchà pro’l vicedirecter scadent Roland Andri per la buna collavuraziun.
Progets – diversas dumondas da princip
La suprastanza cumünala ha trattà ed approvà il cumanzamaint dals seguaints progets: rimplazzamaint dals paracullas i’l implant da tir 300m a Zernez, prüm’etappa da la sanaziun da la manisaziun/regulaziun dal s-chodamaint i’l implant chasa da scoula/bogn da famiglia/center da sport, progettaziun in detagl da la sarinera a Zernez, prüm’etappa da la sanaziun da la Via Maistra a Zernez (lingias aua suos-cha e meteora Denner fin Sfuondrà/En). Quists progets sun gnüts approvats in radunanzas cumünalas i’ls ons scuors. Cun quistas approvaziuns s’haja dat glüm verda a la realisaziun dals progets chi vegnan manats da la direcziun operativa.
Avis champester per l’on 2020
Daspö la fusiun ha la suprastanza relaschà ün avis champester chi regla tanter oter il scumond d’ir aint illa prada. Las datas per quist on da l’avis champester sco eir las datas da l’avertüra da las vias champestras e da god vegnan publichadas a temp ütil sülla pagina d’internet e sül sistem d’infuormaziun digital dal Cumün da Zernez.