Trattativas da la suprastanza cumünala Zernez
Planisaziun cumünala – fabricat p2024 / gvg 57 e fabricat p2528 / gvg 56 in Chantun Susch – dumonda preliminara
La suprastanza ha trattà duos dumondas preliminaras a reguard la planisaziun cumünala suot l’aspet da la zona da planisaziun. Ils proprietaris sun gnüts infuormats suot che circunstanzas cha permiss da fabrica pudessan esser pussibels da conceder.
Planisaziun locala – cusglianza giuridica – decisiun
Sco cusgliader giuridic per las lavurs importantas da la planisaziun locala chi stan i’l prossem temp davant porta es gnü tschernü da la suprastanza cumünala dr. Duri Pally dal büro Bänziger & Partner a Cuoira.
Restructuraziun part forestala in Cul Zernez – dumonda subvenziuns
Per pudair sgürar las contribuziuns davart da l’uffizi da god e privels da la natüra per la restructuraziun da la part forestala in Cul a Zernez esa necessari d’üna decisiun per ün credit cumplessiv davant üna da las prosmas radunanzas cumünalas.
Staziun Lavin – cunvegna Viafier Retica – adöver temporari dal fuond
In connex culla fabrica da la staziun nouva a Lavin ha la Viafier Retica miss sü üna cunvegna per ün adöver temporari dal fuond. La cunvegna es gnüda approvada.
Sanaziun chasa da scoula Zernez – surdatta sanaziun da substanza nuschaivla (Schadstoffsanierung)
La suprastanza cumünala ha surdat las lavurs per la sanaziun da substanza nuschaivla illa chasa da scoula a la firma Asbest Bauschadstoff Sanierung AG, San Murezzan.
Spostamaint termin d’elecziuns cumünalas dals 17 mai 2020
Causa la situaziun reguard il coronavirus ha la suprastanza cumünala decis da spostar la data d’elecziun a l’urna dals 17 mai 2020 nouv sün dumengia, ils 14 gün 2020.
Rendaquint 2019 – 1. Lectüra
Las instanzas cumünalas sun repassadas il rendaquint 2019. Il rendaquint es gnü approvà a favur da la revisiun da quint tras il büro Lischana fiduziari SA a Scuol ed a man da la cumischiun sindicatoria. In mai vain il rendaquint approvà e rinvià a man da la radunanza cumünala dals 22 gün 2020.