Trattativas da la suprastanza cumünala Zernez
Provedimaint central da chalur
La suprastanza cumünala ha approvà las duos dumondas per ün attach vi dal provedimaint da s-chodamaint central, nempe da la CC Chasa Rastò e da Jörg Rodigari.
Tagl da laina sforzà a Raglia – surdatta
Ils contuorns da Raglia, sur Susch, sun gnü chaschunats dons da vent vi dal god da protecziun. Causa cha la laina es derasada in lös na accessibels sto quella gnir allontanada cul elicopter. Quist’incumbenza es gnüda surdatta a la firma Swiss Helicopter AG a Samedan. La lavur d’elavuraziun da la laina es gnüda surdatta a l’impraisa Cla Duri Janett da Tschlin.
Integrar üna staziun da transfuormaziun aint il chasin no. 72 dasper la baselgia refuormada a Lavin – dumonda da princip
Il Cumün da Zernez es gnü dumandà da l’EE-Energia Engiadina a Scuol da pudair integrar üna staziun da transfuormaziun i’l chasin dasper la baselgia refuormada da Lavin. La suprastanza ha approvà la dumonda da princip.
Radunanza cumünala – tractandas provisoricas dals 22 gün 2020
La glista da tractandas provisorica da la radunanza cumünala dals 22 gün es gnüda approvada. A quista radunanza vain preschantà principalmaing il rendaquint 2019.
Büro electoral dals 14 gün 2020
La suprastanza ha elet il büro electoral per las elecziuns cumünalas dals 14 gün 2020. Al büro electoral fan part: Emil Müller sco president, Riet Denoth, Simon Rohner e Fabian Schorta sco actuar.
Nationalpark Bike-Marathon 2020
Il cussagl federal ha scumandà causa il coronavirus da manar tras occurrenzas cun daplü sco 1000 persunas e quai actual fin la fin dal mais avuost 2020. Ils organisaturs dal Nationalpark Bike-Marathon han fat perquai la dumonda da pudair spostar l’occurrenza süls 19 settember 2020. La cuorsa gniss manada tras sün üna stricha alternativa, tanter oter eir cun üna partenza a Zernez. La dumonda es gnüda approvada da la suprastanza cumünala.