Trattativas da la suprastanza cumünala Zernez
Rendaquint 2019 – deliberaziun a man da la RC
La suprastanza cumünala ha deliberà in üna sezzüda cumünaivla cun la cumischiun sindicatoria il bilantsch ed ils rendaquints dal quint da gestiun e dal quint d’investiziun a man da la radunanza cumünala da rendaquint. Ils resultats pel 2019 sun allegraivels e fan spranza per l’avegnir finanzial dal Cumün da Zernez.
Ledscha d'impostas – revisiun
Adattamaints vi da la ledscha d’impostas superiura (chantunala) ha per consequenza, cha’ls cumüns han eir d’adattar lur ledschas d’impostas cumünalas. Quista lavur es gnüda fatta dürant l’ultim mez on. Uossa s’ha pudü, davo cha l’uffizi chantunal d’impostas ha manà tras üna preexaminaziun, deliberar la proposta da la revisiun da quista ledscha a man da la radunanza cumünala, chi varà da decider da rinviar la ledscha a la votaziun a l’urna. I’s prevezza cha la revisiun aintra in vigur süls 1. schner 2021.
Ledscha da pumpiers – revisiun
Experienzas fattas dürant ils prüms ons culla nouva ledscha da pumpiers han dat andit a pitschens adattamaints vi da quista ledscha cumünala. Quista lavur es gnüda fatta dürant l’ultim mez on. Uossa s’ha pudü, davo cha la sgüranza d’edifizis dal Grischun (GVG GR) ha manà tras üna preexaminaziun, deliberar la proposta da la revisiun da quista ledscha a man da la radunanza cumünala, chi varà da decider da rinviar la ledscha a la votaziun a l’urna. I’s prevezza cha la revisiun aintra in vigur süls 1. schner 2021.
Plazza per volver l'auto da Posta sül Pass dal Flüela
Bod süsom il Pass dal Flüela voul il Chantun GR realisar üna fermativa d’autos da posta. Insembel cun l’uffizi d’energia e trafic dal Grischun, culla PostAutoGR e’l Cumün da Tavo s’ha abinà, cha’l Cumün da Zernez surpiglia la realisaziun e la direcziun da fabrica. Il proget cuosta raduond 36‘000.– francs. Davo la realisaziun vegnan scumpartits ils cuosts a charg dal Chantun GR e dal Cumün da Tavo. L’incumbenza es gnüda surdatta a la firma Hew Bauunternehmung AG, Zernez.