Trattativas da la suprastanza cumünala Zernez
Instituziun Pro Castellis – cumprita da 23 fortezzas e da 2 magazins tanter Crastatscha ed il Pass dal Flüela
Sün dumonda da la Pro Castellis, üna fundaziun chi’d es interessada da salvar e mantegner indrizs militarics e chi s’occupa culla perscrutaziun e protecziun da fortezzas chi han üna gronda portada istorica, es interessada d’acquistar da la Confederaziun divers objects militarics sül territori dal Cumün da Zernez. Per cha la Pro Castellis po insomma surgnir ün permiss da müdamaint d’adöver dal Chantun GR ha la suprastanza decis da vulair desister sül dret da cumpra da quists indrizs.
Proget Via Maistra – perizia emissiuns cunter la canera – zona 30
In connex cul proget sanaziun Via Maistra es gnü inoltrà ün recuors davo la prüma exposiziun dal proget. Quel ha chaschunà a las instanzas chantunalas da stuvair laschar far üna perizia in connex cullas emissiuns da canera. Tenor ils respunsabels dal Chantun GR as po tgnair aint las emissiuns da canera be cun redüer il tempo dal trafic tras cumün (fracziun da Zernez) da 50 km/h sün 30 km/h. L’uffizi da construcziun bassa dal Grischun cussaglia da proseguir culla varianta d’üna zona 30 km/h sur tuot la fracziun da Zernez. La suprastanza cumünala ha decis da vulair proseguir culla proposta dal Chantun GR e d’introdüer uschè il tempo 30 sülla via maistra e d’introdüer in quist cas güst eir zona 30 per tuot la fracziun da Zernez, voul dir eir süllas vias da quartier. Plünavant es gnü decis da pretender per las fracziuns da Brail e da Susch üna perizia da canera per inviar eir per quistas fracziuns tempo 30 in tuot la fracziun (inclus la via maistra).
Protecziun da las auas – stadi dal proget
Illa procedura d’approvaziun tras la Regenza dal Chantun GR ha il cumün stuvü laschar tour posiziun a divers pertocs a Susch ed a Lavin sur da müdamaints, cha la Regenza nu voul approvar uschè, co cha’l suveran dal Cumün da Zernez vaiva decis quai oriundamaing. Quai es uossa fat e’l cumün ha respus al Chantun GR i’l sen dals possessurs a Susch e Lavin. I’s spetta cha l’approvaziun segua i’l decuors da quist’utuon.
Seguondas abitaziun ed inventar d'edifizis – stadi dal proget
Illa procedura d’approvaziun tras la Regenza dal Chantun GR ha il cumün stuvü tour posiziun in chosa sur da müdamaints, cha la Regenza nu voul approvar uschè, co cha’l suveran dal Cumün da Zernez vaiva decis quai oriundamaing. Quai es uossa fat e’l cumün ha respus al Chantun GR correspundentamaing. I’s spetta cha l’approvaziun segua i’l decuors da quist’utuon.
Concept da protecziunCOVID-19 – Restorant Center da Sport e Bogn da famiglia
La suprastanza cumünala ha approvà il concept da protecziun preschantà dals respunsabels per quistas duos gestiuns.