Trattativas da la suprastanza cumünala Zernez
Festa dals 1. avuost 2020 – versiun COVID-19
Oriundamaing d’eira previs d’organisar quist on üna festa naziunala redotta, cun resguardar las pretaisas e cundiziuns da la Confederaziun a reguard la crisa da COVID-19. Güst avant la sezzüda da la suprastanza ha la regenza dal Chantun GR comunichà lur giavüsch/proposta als cumüns, da desister sün l’organisaziun da las festas dals 1. avuost a bön da la protecziun da populaziun e giasts. Cun greiv cour ha la suprastanza cumünala decis in quist sen. Cun quai nu daja quist on ingünas festas uffizialas da prüms avuost in nos cumün.
Forz'electrica – definiziun «contribuziun al man public» per l'on 2021
Minch’on ston ils cumüns definir l’import chi vain indemnisà pels drets da passagi/transport d’energia, la «contribuziun al man public». Quista nun es e nu sto esser per mincha fracziun identica, eir scha sün lunga vista fessa sen d’armonisar eir quist import.
La suprastanza cumünala ha decis da definir eir pel 2021 quista contribuziun sco segua:
Zernez 2.1 rps/ukw (0.6rps + 1.5rpsper Zernez Energia 2020)
Brail 0.6 rps/ukw
Susch 0.6 rps/ukw
Lavin 0.6 rps/ukw
Refacziun punt Grialetsch – credit supplementar
In connex cun quista sanaziun as haja güsta eir stuvü refar la punt Madra chi d’eira eir gnüda donnagiada dürant l’inviern 2017/18 tras üna lavina. L’argumaint d’eira da pudair coordinar quists lavurs e da nüzziar sinergias e cun quai eir da pudair spargnar cuosts implü. Per consequenza s’han augmantats ils cuosts cumplessivs dal proget. Il proget es gnü serrà giò dürant il 2018. Ils cuosts cumplessivs s’amuntan a francs 63‘354.61 e sun cun quai per francs 13‘354.61 plü ots co la somma da credit approvada da la radunanza cumünala. La suprastanza cumünala ha approvà la dumonda da credit supplementar.
Viadi implü pels 6 scolarins da Zernez chi frequaintan l'on scolastic 2020/21 a la scoulina Lavin
Per l’on da scoula 2020/2021 van ses scolarinas e scolars da la scoulina da la fracziun da Zernez a Lavin a scoulina. Quista decisiun es gnüda tratta dal cussagl da scoula. Quist maina al fat, chi’s po redüer ils pensums da muossadras a Zernez, ma però cun quai eir a cuosts implü da viadi implü tanter Zernez e Lavin.
La suprastanza cumünala ha deliberà, sün proposta dal cussagl da scoula, il credit per quistas expensas implü. Per l’on da scoula 2021/2022 gnarà lura desisti, causa il nomer da scolarinas e scolarins plü bass, da manar inavant la scoulina illa fracziun da Lavin.
Chasin da cadavers – proseguimaint avertüra publica
La porta dal chasin da cadavers a Zernez d’eira marscha ed es gnüda rimplazzada. Uossa as voul montar üna nadiglia electronica per pudair programmar ils uraris d'avertüra ed avair üna megldra controllada nettaschia e d’igiena davant ed i’l chasin. Implü vain scleri da pudair installar cameras per avair la controlla adequata per quist local. Tenor l’uffizi chantunal (ALTGR) daja diversas racumandaziuns per gestir ils chasins da cadavers. Il cumün es bod in oblig da serrar il chasin da cadavers e d’organisar ils uraris d’avertüra/serrada e d’installar cameras per la survaglianza generala. La suprastanza cumünala ha decis da vulair montar quista nadiglia da l’entrada electronica per pudair organisar fich flexibel las uras d’avertüra dal chasin da cadavers. Implü vegnan installadas cameras da survaglianza.
Agiunta a la cunvegna dal 2007 tanter il Cumün da Zernez e la Sosa Gera SA, chava da crappa Crastatscha
In connex culla chava d’amfibolit Crastatscha ed il lö chi’d es gnüda fatta la rimplaina cul material superplü es gnü fat dal 2007 üna cunvegna tanter il Cumün da Zernez e la Sosa Gera SA. Quista cunvegna regla tuot ils detagls in connex culla lingia d’aua da baiver principala (fracziun da Zernez) chi’s rechatta in quel lö chi’d es gnüda fatta la rimplaina cul material superplü da la chava d’amfibolit. La lingia nun es gnüda spostada, dimpersè cuvernada cun material ed as rechatta uossa in üna profuondità da ca. 10 m. Il Cumün da Zernez es gnü a la conclusiun, cha’l punct a reguard la lingia d’emergenza cun duos vascas ed ün uder da pumpiers, chi nun es gnü accumpli fin in uossa na, nun es pel mumaint necessari. Las lavurs da rimplaina sun gnüdas serradas giò quist on. La lingia d’aua da baiver existenta nun es, dürant las lavurs da la rimplaina, fin hoz na gnüda donnagiada. Tenor stimas da cuosts s’amuntessan ils cuosts pella realisaziun da la lingia d’emergenza sün francs 70'000.–. Üna gronda part da quels cuosts gessan a charg dal cumün. Uossa s’ha chattà culs respunsabels da la Sosa Gera SA ün cumpromiss. Our da quists motivs es gnüda fatta ün’agiunta a la cunvegna existenta, per pudair evader e metter in net las pendenzas da la cunvegna dals 10.10.2007. Las trattativas culs respunsabels da la Sosa Gera SA sun gnüdas fattas directamaing dal president cumünal.
Radunanza cumünala dals 19 avuost 2020 – tractandas provisoricas
La suprastanza cumünala ha decis provisoricamaing da vulair manar seguaints progets in radunanza cumünala dal mais avuost:
– Tscherna dals scrutinadurs
– Decisiun a reguard üna iniziativa inoltrada als 6 mai 2019 cul titel «Per üna suprastanza ed ün cussagl da scoula legitimà democraticamaing»
– Preparaziun e deliberaziun d’üna revisiun da la constituziun cumünala rinviaziun a la votaziun a l’urna dals 27.09.2020
– Preparaziun e deliberaziun d’üna revisiun da la ledscha da votaziuns e d‘elecziuns rinviaziun a la votaziun a l’urna dals 27.09.2020
– Preparaziun e deliberaziun da diversas revisiuns da ledschas cumünalas resp. d’üna ledscha nouva
– Preparaziun e deliberaziun da la ledscha nouva da scoula rinviaziun a la votaziun a l’urna dals 27.09.2020
– Preparaziun e deliberaziun d’üna revisiun dal reglamaint resp. d’üna nouva ledscha dals-chodamaint central da chalur «Cul», Zernez rinviaziun a la votaziun a l’urna dals 27.09.2020
– Comunicaziuns e varia
– Infuormaziuns sur da rendaquints da credits approvats
Büro electoral per las votaziuns dals 27.09.2020
Pel di da votaziuns ed elecziuns da dumengia,ils 27 settember 2020 es gnü defini ed elet il büro electoral cun las seguaintas commembras e seguaints commembers: Emil Müller, president; Seraina Bickel, commembra; Susanna Denoth, commembra; Brigitta Enkerli, commembra; Arno Felix, commember; Simon Rohner, commember; Beat Schärer, commember; Corsin Scandella, actuar