Pleds cumandos e pleds scumandos

Cur cha mammas s’agitan cha lur iffaunts drouvan pleds trids – ed ellas s’agitan pel solit sgrischusamaing – prouvi gugent da las calmer, dschand cha que sajan bain be pleds.
Ch’ellas dessan tscherner qualche pled innozaint scu «fnestra» u «sadella» – e mincha vouta cha lur iffaunt dia quel pled in famiglia fer ün teater inter a chesa pretendand cha quel pled saja ün terribel trid. Cha alura possane esser sgüras cha la prosma vouta cha l’iffaunt la vöglia fer ster mel in societed, schi ch’el dscharo quel pled.
Ma las mammas nu’s laschan persvader. ­Simil am vo que, scha las cusglieras e cusgliers svizzers as dispüttan uras cullas uras sur da la dumanda scha «schi, eau vögl» vela dapü u damain cu «na, eau nu vögl». Ma eir ellas, els faun inavaunt ün teater inter e nu’s laschan calmer. Eir il pled «n» nu po hoz pü üngün dir u scriver cun buna conscienza – oter cu ils nairs svessa.
E taunts oters pleds stos abüsos i’l passo nu’s po hoz pü druver. Il shitstorm, quist bel pled nouv, spetta scu il meglder chaun da vaglia davous porta, pront per sbragir ed assaglir scha’l pled at vess da sguinchir our da buocha.
Daspö cha Putin imprometta 15 ans praschun (u Sibiria) a minchün chi disch «guerra» a sia ­guerra ill’Ucraina suni sfurzo da piglier ün miel pü serius il pisser da las mammas.
Pleds nu sun be simplamaing pleds. Columna FMR: Göri Klainguti