Schatzimausi

I dà caneras chi fan mal a las uraglias, almain a mai. Sco per exaimpel quella da las rotschas da töfs chi vegnan d’instà giò dal Pass dal Flüela, pac toc davent da mia chasa a Susch, e chi’s spartan vers Scuol o vers Sonch Murezzan, adüna dond amo ün pêr jadas gas e vumvum avant co far plazza per la prosma schurma da Harley-Davidsons o las colonnas da Ferrari-Testa-Rossas e Maseratis amalats da l’istessa magogna. Vumvum. «Kinder müssen Spass haben» – scha na uschigliö, schi almain la sonda e la dumengia. S-chüsai, sch’eir eu n’ha meis gaudi cur cha las novitats portan la nouva ch’ün o tschel da quists tavans saja aint per la val rodlà giò aint illa Susasca.

Ed ün’otra benedicziun acustica per mias uraglias maltrattadas esa eir cur cha nus fain üna fatschada da sgrafit impegnativ e là, precis là, sto ün lavuraint d’ün’otra firma tagliar peidras da granit be daspera. Chi nu saja pussibel in ün oter lö, haja nom pel solit. Ma cha la saira, cur cha nus vain fini nos sgrafit eschan dubel uschè fiacs pervi dal disturbi da concentraziun nun interessa als schefs dals tagliapeidras, cun quel stress nun hajan els peida da tour resguard eir amo sün quists curius artists. – Zaitischgeld, halt, pazienza …

Üna canerina plü subtila regnaiva üna jada dürant ün lavur da sgrafit giò pella Valrain. Ün cuntschaint alpinist e sia charischma vaivan fabrichà lur chasa nouva e vulaivan avair decorà l’entrada ed alch fanestras cun «Engadiner Skraffito». Ed uschè eschan rivats, meis duos collavuratuors tirolais ed eu, la bunura sül lö, ingio cha’ls gessins vaivan tuot preparà, tant chi d’eira be amo da dar sü chaltschina e sgrattar oura ils disegns giavüschats. E lura ha cumanzà la musica tanter ils duos conjugals: causa cha la porta chasa vaiva da restar averta dürant nos lavur dudivan nus natüralmaing, lair o nu lair, tuot quai chi gniva dit e clomà per chas’intuorn. Bod clomaivna «Schneckli» a «Mausi» e bod «Stinkerli» a «Schatzi» e viceversa. Robas da na tegner oura, intant cha «Mausi» alpinist preparaiva sias buschas per la prosm’expediziun sül Himalaja. Davo alch uras vaivan nus a fin nos lavur e vain clomà als patruns da gnir a verer. I d’eiran cuntaints e vulaivan be amo avair sgrattà our il nom da la chasa. I vess mancà pac ch’eu scriva per sbagl sü «MAUSI» invezza da «SOLDANELLA», in quista confusiun dad exclamaziuns herzigas. Be per mai vaiva l’impreschiun cha pro tant’amur inchün nu saja dal tuot sauber davo las uraglias. E baincomal, cun dir adieu n’haja fat cas cha la part feminina dals «Mausis» guardaiva cun öglins fich bainvugliaints sü per meis giuven collavuratur tirolais Tumler, quai cha tschel, cun nom Stecher, vaiva eir badà.

Ed uschea esa gnü cha pel prossem temp conversaivan meis duos Vinschgers be plü cun «Mausi» e «Schatzi» – fin ch’eu n’ha stuvü tils dir chi dessan schmetter cun quai, cha a mai gnivan ils «Schnecklis» planet our pellas uraglias.

Paulin Nuotclà è artist da sgrafit, chantautur ed illustratur – e viva a Susch.
La FMR (Fundaziun Medias Rumantschas) furnischa cuntegns medials scrits (per exaimpel texts e graficas) e fotografias per mans da las medias rumantschas. Ella scriva seis artichels in tuot ils tschinch idioms ed in rumantsch grischun. La FMR incumbenzescha eir a persunas rumantschas dastrusch e lontan da scriver columnas sur da quai chi tils occupa illa vita da minchadi.