Üna revolta musicala

Quai es garanti fingià uossa: Quista columna nu pudaraja publichar sün Facebook! Inschinà vegna definitivamaing exclus da las medias socialas. Ün’admoniziun correspundenta n’haja surgni fingià avant duos eivnas. Eu laiva nempe publichar meis text da la Posta Ladina sur dal cudesch da Curdin S. Brunold dad Ardez davart l’istorgia da las musicas instrumentalas in Engiadina, Samignun, Val Müstair, Puschlav e Bergiaglia, eir illas medias socialas. Ma Facebook ha reagi immediat ed ha allontanà il link infra pacs minuts. Causa ch’eu nu chattaiva il text, n’haja provà da publichar quel amo üna jada, ed amo üna...
A quist’impertinenza da mia vart, es lura seguida l’admoniziun: Sch’eu prouva da derasar amo üna jada da quistas istorgias, schi chi’m serran il conto definitivamaing! Il problem para dad esser il pled «revolta». Eu scriv nempe in meis artichel da revoltas musicalas. Tenor il cudesch da Curdin S. Brunold vaiva nempe la Società da musica Zernez defini i’l statüt dal 1876, cha scha ün o plüs commembers da la società as vessan da’s revoltar cunter il «Capellmaister» sainza radschun, schi saja la cuntrapart in dovair da tour partida per quel. 
Para cha quella jada – avant bod 150 ons – as pudaiva amo scriver che chi’s pensa. Grazcha a l’anteriur president da l’America, e grazcha a tuot ils terrorists, guerriers, pirats e bandits sün quist muond, nun para quai hoz – eir in temps da la libertà da l’opiniun – plü dad esser il cas. O forsa nu vessa gnanca das-chü dovrar quists ultims pleds? Scha nu legiais las prosmas eivnas plü nüglia da mai, saraja rivà per quista columna in galera. 

Columna PS: Nicolo Bass