Trabucchi

Ils uffants da Curtins faivan plü bod d’inviern adüna üna schanza da naiv sülla costa suot la via da Tarsous. Schanzas plü grondas daiva bod be a San Murezzan, as vaiva l’impreschiun. Quia as ramassaivan lura ils uffants da Zernez per provar a svolir e far il sigl il plü lung. Jachen – quista mezza purziun – quel sigliva adüna il plü dalöntsch ed as plachaiva sco üna penna giosom la costa. 
Eir eu am partecipaiva minchatant a quista «cumpetiziun». Eu vaiva surgni ün ski da seguonda man cun nom «Trabucchi». Quist ski talian, chi gniva fat a Bormio, nu d’eira propcha il plü bel. Ün ski grisch cun üna scrittüra grischa – uschè til n‘haja almain aint il cheu – simplamaing sgrischaivel. Ma quai nu basta. Il «Trabucchi» d’eira fich greiv e nu’s dozzaiva da la terra. Impussibel da til dozzar oura e svolir, main dir far ün «backflip». Sco scha’l füss la bachetta da la gravitaziun. E sch’el as dozzaiva üna jada be ün païn, schi capitaiva la cupicharoula pac suotvart illa naiv loma. Eu dod amo hoz a tschels uffants cun lur «Atomics», «Rossignols» e «Dynamics» am rier oura. Plü tard n’haja lur surgni da seguonda man quel «Atomic» gelg da Super G. Quai d’eira lura üna maschina! Per mai bler massa svelt, ma quai es ün’otra istorgia. 
In mincha cas cha tuot quistas atletas ed atlets chi siglian dürant ils champiunadis mundials da Freestyle a San Murezzan sur quistas schanzas extremas, nun han ingüns «Trabucchis» vi dals peis. I bandunan la schanza sco schi lessan siglir sülla glüna. Sco pennas in ün boffaduoir fana lur piruettas i’l ajer ed as plachan sco ün giat (bod) adüna süls skis. Quistas prestaziuns fan star culla bocca averta e meritan grond respet ed arcugnuschentscha. Da quai esa da trar il chapè. Quai nu füss gnanca Jachen bun da far.
Bun es in mincha cas, cha culs champiunadis mundials a San Murezzan han quistas prestaziuns incrediblas surgni l’arcugnuschentscha e la visibiltà meritada. 
Dal rest: La ditta «Trabucchi» da Bormio prodüa hozindi skis da tura «Trab». Eu pens cha quels nu dovraran ingünas pels...

Columna: Nicolo Bass