Ils Dis europeics dals monumaints als 11 fin 13 settember d’ingon vegnan realisats eir illa clostra da Müstair. Sco cha la Fundaziun Clostra Müstair scriva illa comunicaziun als mezs d’infuormaziun invida ella in venderdi a las 18.30 illa Chasa Selm ad ün inscunter per as laschar infuormar davart ün mumaint istoric: Davo la porta da fier da l’archiv da la clostra as rechattan documaints e scrittüras da grondischma valur.

Da scrittüras fin disegns
Var 5000 archivalias dad 1250 ons istorgia da la clostra vegnan quia tgnüdas in salv, da fragmaints da scrittüras carolingicas fin disegns da la muongia ed artista sour Pia Willi. «A partir da las 17:30 pon persunas interessadas tour suot ögl ils documaints in l’archiv digital ed imprender a cugnuoscher la plattafuorma Porta Cultura.» Davo preschaintan Romina Ebenhöch dal museum da la clostra Müstair, Sandro Decurtins dal Archiv statal Grischun e Sarah Amsler da l’Uffizi per cultura chantunal l’adöver da la plattafuorma www.portacultura.gr.ch.

L’importanza da la protecziun
Il motto dals dis dals monumaints es ingon «In privel?». Perquai vegnan tematisats sper l’importanza da proteger l’ierta culturala eir ils privels concrets per quella. In sonda a las 15.00 preschainta il cumandant dals pumpiers da Müstair strategias per proteger vitas umanas e bains culturals dad incendis ed otras cata-strofas. Mantgnüts vegnan bains culturals eir cun preschantar l’ierta audiovisuala: La clostra da Müstair invida ad ün concert gregorian dal 15 e 16avel tschientiner cun plüssas vuschs e suns da l’orgel. 

text: pl/fmr
fotografia: Fundaziun Clostra Müstair