In lündeschdi saira ha gnü lö la radunanza d'infuormaziun davart l'avegnir da la scoula i'l cumün fusiunà da Scuol. Sco cha Radiotelevisiun Svizra Rumantscha rapporta es statta la sala cumünala a Scuol plaina stachida. La suprastanza ha infuormà davart l'intenziun dad abolir las scoulas a Ftan e Tarasp. Quai per duos motivs: la mancanza da scolaras e scolars e las finanzas. Fin dal 2034 daraja tenor calculaziuns davart la demografia ün quart damain scolaras e scolars a Scuol. Cun avair be amo trais impè da tschinch scoulas pudessan gnir spargnats 900 000 francs.  Ils uffants da la fracziun da Ftan dessan visitar in avegnir la scoula ad Ardez, ils uffants da Tarasp quella da Sent. A la radunanza d'infuormaziun haja dat be votums cunter quista fusiun. La suprastanza ha infuormà da vulair introdüer ils müdamaints a partir da l'on 2028/29.