Las elecziuns cumünalas a Scuol han mainà üna surpraisa: Il capo cumünal actual, Aita Zanetti, sco unica candidata, nun es gnüda reeletta i’l prüm scrutin. Ad ella mancaivan 21 vuschs per ragiundscher la majorità absoluta da 426 vuschs. Ulteriuras vuschs han fat Reto Rauch (158 vuschs) e Riet Fanzun (140 vuschs). Implü sun idas 147 vuschs ad ulteriuras singulas persunas. Remarchabel es eir il fat cha 130 vuschs sun stattas vödas o na valablas. La partecipaziun per l’elecziun dal capo cumünal es statta be 28,9 pertschient.
Cha la decisiun da serrar las scoulas da Ftan e Tarasp varan üna consequenza süllas elecziuns cumünalas d’eira consciaint eir al capo cumünal actual, Aita Zanetti. Chi nu basta, sco unica candidata ed eir sco capo in carica, da gnir reeletta i’l prüm scrutin es listess üna surpraisa. Ch’ella stopcha uossa analisar il resultat e lura decider sch’ella voul insomma amo candidar, ha Aita Zanetti dit invers RTR cuort davo cha’l resultat es stat cuntschaint. Sco chi va inavant gnarà perquai cuntschaint ils prossem dis. Cler es fingià uossa, cha’l seguond scrutin varà lö als 15 november.

Suprastanza cumünala cumpletta
Gnü lö quista fin d’eivna ha eir l’elec-
ziun da la suprastanza cumünala da Scuol. Eir pro quists resultats as bada las discussiuns intuorn l’avegnir da las scoulas. Las plü bleras vuschs han nempe fat duos candidats nouvs: Il meglder resultat ha fat Simone Clalüna da Sent cun 725 vuschs, Mathias Eisenhut da Tarasp es elet in suprastanza cun 593 vuschs. Ils duos candidats da fin quà Fadri Blanke da Ftan e Curdin Thomas dad Ardez sun gnüts reelets tuots duos cun 566 vuschs. Remarchabla es eir l’elecziun da Berta Prevost da Guarda cun 523 vuschs. Sia candidatura per la fracziun da Guarda es nempe gnüda cuntschainta pür ün’eivna avant l’elecziun. Il rapreschantant da Scuol, Dario Giovanoli ha surgni cun 389 vuschs las plü pacas vuschs per la reelecziun. Quai sun be 24 vuschs daplü co la majorità absoluta da 365 vuschs. Cun quistas ses persunas es la suprastanza cumünala cumpletta. Na bastü per ün’elecziun in suprastanza haja a Giovanni Bott da Scuol. El ha surgni 145 vuschs sainza esser stat candidat ufficial. Surgni vuschs han eir Duri Valentin (52 vuschs) e Curdin Kindschi (50 vuschs) da Ftan. In tuot 762 vuschs sun idas a singulas persunas. La partecipaziun per l’elecziun da la suprastanza cumünala es statta pro 29,6 pertschient.

Cumischiun sindicatoria e scoula
La plü ota partecipaziun ha gnü cun 38,4 pertschient l’elecziun da la cumischiun sindicatoria. Gnüts elets sun Thomas Lampert cun 755 vuschs, Gian Reto Fedi (652 vuschs), Tiziano Castellani (606 vuschs), Gudench Bischoff (605 vuschs) e Katharina Gericke (482 vuschs). Ella as vaiva retratta da la 
cumischiun sindicatoria e per finir 
listess decis da candidar per ün’ulteriura perioda d’uffizi. Las ulteriuras quatter persunas elettas sun tuots nouvs commembers da la cumischiun sindicatoria. Pro üna majorità absoluta da 363 vuschs ha surgni Maurus Gerber 308 vuschs. Per ün’elecziun nun haja bastü, la cumischiun sindicatoria es eir cumpletta. 
Il cussagl da scoula as cumpuona a partir dals 1. schner 2027 da Niculin Caviezel (714 vuschs), Jan Sedlacek (713 vuschs), Simon Könz (686 vuschs), Simone Stähli (602 vuschs), Flavia Loher (574 vuschs) ed Annina Mengiardi (499 vuschs). Cun 89 vuschs nun ha Anassia Casanova dad Ardez ragiunt la majorità absoluta da 348 vuschs. Pel cussagl da scoula es la partecipaziun statta la plü bassa, nempe be 26,2 pertschient. 

Text: Nicolo Bass