Tenor il manader da l’infrastructura dal cumün da Zernez, Livio Conrad, nun es il provedimaint d’aua periclità illa fracziun da Susch. I dà otras funtanas cun aua da baiver chi sun tachadas ed in funcziun. Il manader conferma l’avaria sün dumonda da la FMR. El declera ch’ün chasin d’aua da fuond i’l perimeter da l’avaria – chi vain uschigliö eir dovrà pel provedimaint d’aua da baiver – es gnü tut our d’funcziun profilacticamaing. Il cumün ha sustgnü l’Uffizi per la natüra e l’ambiaint dal Grischun subit davo l’accidaint illa organisaziun ed execuziun da las masüras d’urgenza cun pulir ed allontanar il diesel sorti. Las masüras per la pulizia han cumpiglià duos fouras a tarader e sondagis per pudair perseguitar il diesel derasà sül prà ed ingiò fin vers l’aua da fuond.

Livio Conrad manaja cha’l plü important sajan stats la protecziun da la resursa aua e’l ris-ch per la populaziun da Susch. Cunquai cha l’aua da fuond cula cun gronda probabilità parallel cun l’En es la spranza gronda, cha la rasada da diesel po gnir recuperada sainza influenza sül flüm. Mardi, ils 22 settember han cumanzà las lavurs per allontanar il diesel our da la natüra. Quant lönch cha las masüras düran, nun es amo pussibel da valütar. (fmr/ab) 

FMR

La FMR (Fundaziun Medias Rumantschas) furnischa cuntegns medials scrits (per exaimpel texts e graficas) e fotografias per mans da las medias rumantschas. Ella scriva seis artichels in tuot ils tschinch idioms ed in rumantsch grischun. La FMR incumbenzescha eir a persunas rumantschas dastrusch e lontan da scriver columnas sur da quai chi tils occupa illa vita da minchadi.